һәр авылның үз законы,
Тик бар охшаш сыйфаты.
Шундый сыйфатларның берсе
Нәселең кушаматы.

Дәрәҗәле кешене дә
Тигезли туган ягы.
Монда кемдер Чыпчык кызы,
Кемдер Тукран малае.

Йөреп булмый туган якта
Чөеп борынны күккә.
Нәселеңә карап сиңа
Бәя биргәннәр күптән.

Шушы бәя берләштерә
Ыруг, нәселең халкын.
Ата-бабаң дәрәҗәсен
Төшерергә юк хакың.

Рәнҗетмә буыннар рухын,
Гамәлең белән күтәр.
Дөньяда без кунак кына,
Гомер барыбер үтәр.

Әйтсеннәр, ерак төшми дип,
Алмагачның алмасы.
Арттыр нәсел дәрәҗәсен,
Үкенечкә калмасын.