Яз айлары яшел келәм җәя,
Туган җирнең тирә-ягына.
Күңелемә чиксез моңнар тула,
Җыр сузса да тургай аз гына.

Уянасың сандугачлы таңда,
Иркенәйтә һава сулышны.
Ямьле язның сихри гүзәллеге
Бизи гөлдәй матур тормышны.

Яшәрәләр Саба урманнары,
Яшәрәләр киң-киң болыннар.
Алсу йөзле һәр бер чибәрләргә,
Йөрәкләрдә безнең урын бар.

Таптамыйм дип сары чәчкәләрне,
Чыклы җиргә аяк басасың.
Бакчадагы шомыртларны күреп,
Киләчәккә илхам аласың.

Язлар белән без дә яшәрәбез,
Оя корып яшьлек иленә.
Сәгать санап, узган вакытларны,
Булмаса да борып кирегә!

Безнең Telegram каналыны язылыгыз, һәм беренчеләрдән булып иң соңгы шигырьләрне, яңалыкларны укып торыгыз!

Фикерләр 0 Авторизация
Фикер калдырыр өчен авторизация узыгыз! Яңалары (аста)
  • Өстә
  • Аста