Әйдә әле, ач күңелең

Бик күңелле, яшәү рәхәт
Күңелләрең бикләмә.
Бәхет янда очып йөри,
Күрмим диеп, үртәмә.

Әйдә әле, ач күңелең,
Керсен түргә саф һава.
Инсаннарга сафлык җитми
Бу тынгысыз дөньяда.

Ни дисәң дә, җир түгәрәк,
Түгәрәктән әйләнә.
Койрык кебек гамәлләрең
Һәр адымга бәйләнә.

Әйдә әле, ач күңелең
Керсен түргә яктылык.
Оялып торган бәхетең
Күптән оя корырлык.
19.02.2025
Алсу Галеева, Актаныш