Агым суга тиңли халык
Үзе узган гомер юлын.
Сыналырга кабул итеп,
Йөртә Ходай газиз колын.

Туа, үсә, дөнья көтә,
Мизгелләрен тоймый кала.
Биек тауга менеп баскач
Хәтирәләргә урала.

Хәтирәләр катлы-катлы:
Бар чыбылдыклы бишек тә.
Олы юлга озатып калган
Шыгырдавыклы ишек тә.

Үткәннәрнең һәрбер көне,
Уйлый калсаң бар да истә:
Авыр булса да балачак,
Ул нигәдер алсу төстә.

Истә калган яшь вакытлар
Үзебез күк тыйнак иде.
Җаннар белән матур булып,
Нәрсә булса, шуны кидек.

Әти-әни тәрбиясе
Барчабызны кеше итте.
Хезмәт сөю һәм тырышлык
Көн күрергә эшле итте.