Хәтер буйлап сәяхәткә чыктым,
Яшьлек сукмакларын урап уздым.
Күпме хәтирәләр анда сакланган,
Онытылмый алар вакыт узганнан.

Әйтерсең лә кичә генә булган,
"Зур үсәсе килә" дигән балачак.
Олы чакның өстенлеген күреп,
Акылыбызны бераз җуйган чак.

Һаман килә язлар, матур җәйләр,
Алтын көзләр килә ел саен,
Соңнан килә ак патша - кыш,
Кайтмый гына сабый чак бүген.

Яшьлек тә бит бары мизгел төсле:
Менә бүген син хыялый студент,
Дәртең белән таулар этәсең,
Ә иртәгә инде бишек тирбәтәсең.

Ваемсыз чакның аңлыйбыз шул тәмен,
Зур тормыш юлына аяк баскач кына.
Эх, кайтырга дип үткән елларга,
Күңелебез соңнан еш ашкына.

Яраламыйк тиккә газиз җаныбызны,
Һәр вакытның да бит үз яме бар.
Үтсә-үтсен, әйдә, айлар, еллар,
Тик китмәсен бездән хәтирәләр.

Ни кызыгы булыр иде яшәешнең,
Җан җылытыр хәтирәләр булмаса.
Дус, туганнар белән җыелышып,
Үткәннәрне барлау рәхәт ләбаса.

Безнең Telegram каналыны язылыгыз, һәм беренчеләрдән булып иң соңгы шигырьләрне, яңалыкларны укып торыгыз!

Фикерләр 0 Авторизация
Фикер калдырыр өчен авторизация узыгыз! Яңалары (аста)
  • Өстә
  • Аста