Җәй сулышы

Оста рәссам кулларында җәй хәяте чалына:
Мизгелләрне иярләгән бер тылсымлы пумала.
Өермәдәй хәрәкәтне туктатып карале син,
Кошлар җыры, урман шавы, бу җәйгә гашыйктыр мин.
Ап-ак кыштан яз арчыла, туфрак исә — кап-кара,
Кояш иркәләп үстергән яшел чирәм кузгала.
Ә бүген җәй, әле дә җәй! Яшеллеккә сибелгән
Кызыл, сары, зәңгәр төсләр чәчәкләргә чигелгән.
Үз төсендә җиләк-җимеш, алмагачта алмалар
Бакча яныннан үткәндә бал исенә маналар.
Туган ягым хозурлыгы шуның өчен сөйдерә,
Күңелемнең сандыгыннан җәй сулышы бөркелә.
30.07.2024